Alla Itolae Nusa 13
Eleki Abrame kai eni bina kai kwalini eni nana Lote esi keu bei Mesire lori tape Negepe.
Abrame eni taneiaru boka titinai, eni binatana kai mase kai perake boka.
Hoko ikeu bei tape Negepe lolete Betele. Ikeu mere, ibei otoi sae kena otoi makete, eleki iluake ndete otoi rebe akmenare iono tenda kenare. Otoi mere me Betele kai Ai esi tlela.
Me otoi rebe akmenare ieleke maka pala taneia rebe rilukele ete TUHANE. Ete mere pine itatu loko TUHANE.
Lote rebe ikeu sakesa kai Abrame, eni domba kai pipi bokala, sape bokala kai eni tenda bokala lekwe.
Po tapele otoi mere esi tapuane kena ala binatane pelasi mo le esi taneiaru kai binatane pialaru boka kuate hoko esi supu rue lupu mo.
Bei mere hoko Abrame eni tamata maka raka binatanaru esi ono lomai kai Lote eni tamata maka raka binatanaru. Kena mere tamata Kanane kai tamata Perisaru esi rue kena tapele mere.
Eleki Abrame ibeteke loko Lote be, “Leke luai ono lomai yake, kai auku maka raka binatanaru kai amu maka raka binatanru esi ono lomai yake le ite kwalitoi,
hoko luai keu bei lomai neka. Hoko tapele meije sebeie alilake otoi sae etemu neka. Sepo alilake sapleuke mapale hoko au sapleuke makwanale neka, po sepo alilake sapleuke makwanale hoko au sapleuke mapale neka.”
Eleki Lote iselu be me Yordane esi kweune roma kota Soare kwelea bokala kai tapele otoi mere nkopa titinai lupe ndinu Edene kai lupe tape Mesire. (Kena mere TUHANE Iatia kota Sodome kai Gomora mosa).
Lote ililake otoi me Yordane esi kweune mere pusue etei. Eleki esi keu bei lomai hoko Lote ikeu sapleuke lemataije sa.
Abrame irue me tape Kanane yo Lote irue me kotaya me Yordane esi kweune hoko iono eni tendare tehaike Sodome.
Tamata Sodomaru esi neu titinai kai esi ono dosa ete TUHANE.
Kena Lote ikeu bei Abrame peneka, TUHANE Ibeteke loko Abrame be, “Alimese keholi bei me otoi rebe akele.
Le pusue tapela rebe aselue mere Au rilukele ete ale kai amu anubuaru eti pela.
Kai Au ono amu anubuaru esi boka titinai saka lopone, eti sae isupu neheke ruasi moneka, saka lopone sae isupu neheke rua more.
Hoko aatneka kena keue pusue tapele lalei meije esi nanuke kai esi elake le tapele meije pine Au riluke ete ale.”
Eleki Abrame ihetie eni tendare kai irue tehaike ai tarbantine uwei me Mamre tehaike Hebrone. Eleki ieleke otoi kena pala taneia rebe riluke ete TUHANE ete mere.